Só porque si

Talvez o merlo cante porque non sabe
recibir doutro xeito a madrugada
tal como eu, ollos abertos
e corazón fechado,
empuño o rotulador e queimo pontes
que non me arden
nos trazos vermellos con que avanzo
polas páxinas coma se nada e todo
ou todo e nada
coma que
coma cantando sen gana
como o día rompe sen permiso da escuridade
así o mundo no seu sitio coma sempre
e nunca xa o mundo coma antes
como o merlo, eu, sen motivo á alba.