Febreiro

Como se febreiro fose o peso dun século
apenas levanto xa os pés no pouco que camiño,
mastigo lento e bebo a grolos
este inverno que parece o derradeiro.
E quen sabe?
Talvez sexa.
Parecer, xa dixen, parece mesmo.
Xa non espero que chegue a primavera,
non vaia ser que nin repare en min,
tan despistada sempre
ela.

Como se febreiro fose o peso frío dunha campa,
que nin alento me presta.