Alheamento

O essencial é ligar o silêncio ou
então apagar o sinal, que as interferências
não firam a tensa fragilidade do dia,
para chegar ao entardecer de objectivos
cumpridos e corpo virtualmente inerme
ao roçamento das sombras e ao premente rumor
das vozes que se assolapam, espectrais.

Virar a página ou chorar

Talvez aprendi a orgulhar-me de mim
enquanto apanhava na língua as migalhas de amor próprio
que sobraram na toalha cintilante da noite.
Calquei na térrea firmeza do chão, os pés como lagartas,
e lancei-me a imaginar o voo derradeiro das borboletas
que viria com o alvorecer dos dedos e o orvalho
luminescente a atear-me um sopro de humidade ainda.

No final da tarde, outono

Está um silêncio tíbio na praça
que já não recebe ombros nus
nem óculos que disfarcem olhares
ou desejos pendurados dos decotes.
Ressuma a tarde devagar na pele fina
do casaco e aqueço os dedos entalados
na chávena dum remedo de café.
Deambulo por tropos como viagens
nesta ilha sem fronteiras que me abafem.
Petisca aos meus pés uma pomba
o farelo do bolo que me adoçou
as horas da penumbra iminente.
Paguei a conta, guardei-me no livro.

O homem segue os meus passos lentos
como quem vê afastar um cadáver.

Limpeza

Estrulla información e datas,
apaga xestos,
risca acenos,
borra ligazóns e imaxes,
cala os acordes todos e os compases,
disimula as palabras dentro da orde
caótica e impoluta do escritorio,
elimina as fotografías unha a unha
e no desterro definitivamente
difumina o perfil
e lima as impresións dixitais do pasado.

No future.
Que todo quede en nada
e na nada nada sobre.

Dúas visións non-pre-vistas nunha terraza

Non-deja-vu un: infancia

Quería eu correr así
con toda a felicidade dun grito breve,
os ollos abertos coma homo-pratos
cara á muller que le poemas
mentres ti contas arrimado ao chopo
perseguindo de esguello (un,
dous, tres...) os meus pasos alados.

(...dezanove, vinte!)
E que non houbese agocho
en que me non atopases.


Non-deja-vu dous: madurez

Hai homes que camiñan de brazos
en arco e separados do corpo,
como se o seu corpo precisase
de roubar o espazo aos outros.
Son eses mesmos homes que camiñan
(sen mirar para a muller que le)
de pés para fóra en ángulo
digamos que agudo co seu pene.

Non hai estrada larga
que lles chegue.

Chocolate

Eu sei que tenho nos lábios
restos de chocolate.
Foi apenas essa doçura
que sobrou para eles.

Após o gelado é tudo
frialdade
(e chocolate nos lábios).

De tanto devorar palavras mortas
fui-me morrendo pelos olhos
para logo ressuscitar lambendo
dos lábios o chocolate que sobrou.

Ao abrente en ruínas

Hoxe erguinme material de derriba
ou demolición na esfarna
que a xeada maieira frustrou,
proxecto de cascallo na imprevisión
dun orzamento de vida escaso.

Agoireime no silencio que segue
ao esboroar catastrófico dos teitos
baixo o peso da poalla que non cesa
e os couselos okupas que se asañan
en tecer a intemperie allea miña.

As paredes, esas, serán dun descabalgar
vagaroso e bambo, imperceptible,
a abrigar aínda as trabes partidas,
os cacos punxentes das tellas
e as amoras doces das silveiras.